«متجوزني على الورق».. محكمة الأسرة بالقاهرة تقضي بطلاق زوجة للضرر

"حياتي بقت جحيم من أول يوم زواج"، بتلك الكلمات وقفت الزوجة "ص. ع"، أمام محكمة الأسرة تطلب طلاق الضرر مؤكدة أنها تزوجت وهي تتمنى تكوين أسرة، لكن منذ أول يوم زواج شعرت بالصدمة، مضيفة بجلسة محكمة الأسرة: «تزوجت وأنا أتمنى من ربنا أسرة سعيدة، بس الراجل عاملني بمنتهى القسوة، وقال لي: لولا أهلي وضغطهم عليّ ما كنت اتجوزتك».

حياة جحيم من أول يوم زواج

وأضافت الزوجة أمام محكمة الأسرة أنها تشعر طوال الوقت بالنقص والكره لنفسها، ولا تملك بيدها شيئا لتفعله، متابعة : «حاسه طول الوقت بالنقص والخوف، مش عارفة أعمل إيه، أصبر عليه ولا أسيبه؟، هو من الأول قاللي مش هيقرب مني ودي كانت إرادة أهله، أنا بقيت محبوسة بين خيارين صعبين».

الصبر ما نفّعش.. والزواج بقى عذاب

وتابعت في دعوى طلاق الضرر والتي جاءت برقم رقم 184 لسنة 2026: «قررت أصبر بعد ما والدتي قالتلي اصبري، لكن كل يوم كان بيمضي يزيد معاناتي، وبعد شهرين جه وقال لي إنه هيتجوز اللي بيحبها وأهله موافقين، وشَرط إني أفضل على ذمته عشان يخلص الموضوع».

وأضافت الزوجة امام محكمة الأسرة أنها لا تصدق ما فعله بها، وتسائلت ما العيب بها، مضيفة: «مش مصدقة اللي بيعمله، بعد ما تحملت 5 شهور عيشة صعبة، طلبت الطلاق ورفض بكل أنانية، دلوقتي عايز أعيش معاه على الورق بس وييجي لي بضرة».

محكمة الأسرة تنصف الزوجة وتفصلها عن جحيم الزواج

بعد ما سمعت محكمة الأسرة بعابدين أقوال الزوجة وفحصت الأدلة، رأت إن الضرر النفسي والمادي اللي وقع عليها يستدعي طلاق الضرر، وأصدرت الحكم بالفصل بينهم.